ابن صفی کو ایک صدی کا سب سے مقبول اردو مصنف کہنا شاید غلط نہ ہو۔ ان کی "جاسوسی دنیا" اور "عمران سیریز" کے ناول ریلوے اسٹیشنوں پر، کرائے کی لائبریریوں میں، اور تکیوں کے نیچے چھپا کر پڑھے گئے۔

"خوفناک عمارت" وہ ناول ہے جس سے علی عمران پہلی بار سامنے آیا۔ ایک ویران عمارت ہے جہاں لاشیں ملتی ہیں، اور پولیس کو کچھ سمجھ نہیں آ رہا۔ پھر ایک عجیب سا نوجوان آتا ہے جو بے وقوفوں جیسی باتیں کرتا ہے، الٹے سیدھے شعر پڑھتا ہے، اور سب سے پہلے معمہ حل کر لیتا ہے۔

عمران کا کمال یہی ہے کہ وہ احمق بن کر سب کو بے وقوف بناتا ہے۔ ابن صفی کا مزاح، تیز مکالمے اور صاف ستھری زبان اس کے بعد کے سو سے زیادہ ناولوں میں چلتی رہی۔

1955 کے آس پاس چھپا۔ اگر کسی نوجوان کو اردو پڑھنے کی عادت ڈالنی ہو، تو یہ اس کے لیے بہترین پہلی کتاب ہے۔